Ar teksta video ”Izmyrušuo vīta” muzikis Sovvaļnīks dasoka jaunu dzīsmi.

Piec nalelys pauzis muzikis Sovvaļnīks publicej teksta video dzīsmei “Izmyrušuo vīta”. Dzīsmis teksta autors ir rogovkīts Pīters Jurciņš. Tīši Pītera Jurciņa dzejūli, kas tyka pīduovuoti Sovvaļnīkam deļ dzīšmu saceriešonys vītejū pasuokumu boguotynuošonai, kliva par īmaslu aļbuma “Cārtumi” īrokstam, kura gaideišonys svātki vēļ turpynojās.

Zynūt Sovvaļnīka patyku pret skumi, aizmiersteibu, depreseju, Pītera Jurceņa dzejūļs atroda sovu vītu muziķa daiļradī kai vīna nu skumeiguokajom dzīsmem. Lai paspylgtynuotu izjiutys, kurys pīduovoj dzejūļs, pateicūtīs Dāvim Kotam tyka radeits teksta video, kurymā ir izmantuotys vītejuo fotografa Arvīda Gļaudys Nautrānu apleicīnis pamastūs sātu biļdis. Kai soka Dāvis Kots: “Dzīsmis video veiduots kai ceļojums atmiņuos – par aizmierstam, pamestom i pagaistūšom vītom Latgolā. Ar animacejis, kusteibys i atmosferys efektim attāli klius telpiski i dzeivi, dūdūt vareibu skateituojam īgrymt ainovā i pamaneit tymā seikys detalis.”

Sovvaļnīks ir pabeidzs dorbu pi sova caturtuo albuma “Cārtumi” (latvīšu literarajā volūdā – “Rētas”). Jau piec pyrmuos publicātuos dzīsmis “Karaļs” klauseituoji var nūprast, ka aļbums atsaškiers nu īrostuo Sovvaļnīka smagnejuo skaniejuma, bet saglobuos melanholiskumu, kas rakstureigs gon juo muzykai, gon latgalīšu  autoru (O.Seiksts, A.Rancāne, Mareji Dzeisla i.c.) dzejai.

“Lai cik skumji nabyutu, bet mes mierstam, i sāta jiut, kod jei palīk vīna, arī jei saskumst. Bet vyss jau īt pa riņči, kur koč kas mierst, tī arī dzymst. Voi atdzimšona nūtiks dreiži?” vaicoj Sovvaļnīks.

Sovvaļnīks (eistajā vuordā Ingars Gusāns) ir latgalīšu muzikis, kurs da ituo ir izdevs treis albumus – “Sūpluok” (2009), “Bolts susātivs” (2010) i “Napaseitynuots” (2016), kurūs asūšuos dzīsmis ir saraksteitys ar pazeistamūs latgalīšu dzejnīku (Ontona Kūkuoja, Annys Rancānis, Oskara Seiksta, Valentina Lukaševiča i cytu autoru) vuordim.

Jaunuos dzīsmis “Izmyrušuo vīta” īrokstā pīsadalejuši ari Edijs Strušels (klavīris) i Gints Stankevičs (tausteni). Dzīsmis īroksts taiseits  gon Rēzeknī ar Denisa Smirnova paleidzeibu, gon Reigā, “Factory Sounds Studio” pi muzykys producenta Ginta Stankeviča.

Albums “Cārtumi” izdūšonai teik gataveits ar Vaļsts kulturkapitala mierkprogramys “Latvīšu viesturyskūs zemu atteisteibys programa” i bīdreibys “Latgolys regiona atteisteibys agentura” atbolstu. Projektu eistynoj bīdreiba “Latgolys Producentu Grupa”.