Ar dzīsmi “Karaļs” muzikis Sovvaļnīks dasoka jauna albuma gaideišonu!
Piec garuokys pauzis, publicejūt dzīsmi “Karaļs”, jaunumus muzykā latgaliski klauseituojim pīduovoj muzikis Sovvaļnīks. Dzīsmis “Karaļs” teksta autors ir dzejnīks Arvis Viguls, bet puorlykumu latgaliski taisejs literats Valentins Lukaševičs. Ar jaunū dzīsmi Sovvaļnīks dasoka nuokamuo goda suokuos gaidomū muzykys albumu “Cārtumi”.
Kaidu šaļti Sovvaļnīku varēja dzierdēt tik koncertūs, bet piec garuokys pauzis latgalīšu muzikis publicej jaunu dzīsmi i aizsuoc jauna albuma, kas jam byus jau catūrtais, gaideišonu. Dzīsme “Karaļs”, kurys teksta autors ir Latvejā labi zynomais dzejnīks, atdzejuotuojs i tulkuotuojs Arvis Viguls (dzejūļs publicāts Vigula dzejis kruojumā “Blusu cirks” (2021)), bet latgaliskuo puorlykuma autors literats i literaturzynuotnīks Valentins Lukaševičs, kai pyrmatskaņuojums izskanēja pārnejuo gods Dzejis dīnuos – dzejis slamā latgaliski “Rogovkys dzejis voga 2024”. Niu dzīsme īraksteita studejā i teik pīduovuota klauseituoju viertiejumam.
Itūšaļt Sovvaļnīks struodoj pi sova jaunuo albuma “Cārtumi” (latvīšu literarajā volūdā – “Rētas”). Kai skaidroj muzikis, juo catūrtais albums cīši atsaškiers nu da ituo īrostuo Sovvaļnīka skaniejuma, raksturojūt jū kai kvalitatativu, izjustu i puordzeivuojumim pylnu dzeju latgalīšu volūdā Sovvaļnīka gondreiž akustiskā izpiļdejumā. Albuma dzīšmu tekstu autori, muzikim turpynojūt ari latgalīšu literaturys raksteituoju dorbu populariziešonu muzykā, byus Anna Rancāne, Ontons Kūkuojs, Oskars Seiksts, Marija Dzeisla, Pīters Jurceņš i Valentins Lukaševičs.
“Karaļs ir persona, kas nūruoda ceļu, pa kuru vālams īt pavaļstnīkim – puorejom tūpūšuo albuma dzīsmem. Voi juos tū dareis? Tys byus radzams drupeit vāluok – nuokamuo goda suokuos gaidomajā albumā. I taišni klauseituoji byus tī, kuri varēs atsaceit iz itū vaicuojumu,” īzeimejūt muzykys jaunumus, soka Sovvaļnīks.
Sovvaļnīks (eistajā vuordā Ingars Gusāns) ir latgalīšu muzikis, kurs da ituo ir izdevs treis albumus – “Sūpluok” (2009), “Bolts susātivs” (2010) i “Napaseitynuots” (2016), kurūs asūšuos dzīsmis ir saraksteitys ar pazeistamūs latgalīšu dzejnīku (Ontona Kūkuoja, Annys Rancānis, Oskara Seiksta, Valentina Lukaševiča i cytu autoru) vuordim. Muzykali da ituo izdūtī albumi īzeimej plotu žanru byušonu – nu poproka da metala –, bet, kai pīzeist pats muzikis, jaunuo dzīsme i gaidomais albums varātu byut puorsteigums daudzim Sovvaļnīka dailradis cīneituojim, kam jis byus cytaižuoks – gondreiž akustiskys. Muzikis reizē soka: “Bet tys nanūzeimoj, ka smoguokai muzykai Sovvaļnīks ir dalics punktu.”
Jaunuos dzīsmis “Karaļs” īrokstā pīsadalejuši ari Mareks Gusāns (bungys, gitara), Mārcis Lipskis (bass). Dzīsmis īroksts taiseits Reigā, “Factory Sounds Studio” pi muzykys producenta Ginta Stankeviča.
Albums “Cārtumi” izdūšonai teik gataveits ar Vaļsts kulturkapitala mierkprogramys “Latvīšu viesturyskūs zemu atteisteibys programa” i bīdreibys “Latgolys regiona atteisteibys agentura” atbolstu. Projektu eistynoj bīdreiba “Latgolys Producentu Grupa”.
Informaceju sagataveja:
Inga Vigule
projekta vadeituoja
+371 28335357
